工作時間又有改動。現在逢星期一二五返朝八晚五，歸家休息一陣或者跑吓步，再由七點做到凌晨。通常我會騰空星期三四，瞓到自然醒，視乎心情去散步、睇書、睇戲，的起心肝執吓屋，又或者索性乜都唔做。餘下周六日重可以見朋友。如此安排，有工開啲日子當然好累，但一星期有四日假，又係幾爽。
四月初開始新時間表前，剛好同屋又準備返新工，兩丁友有三日假期。有晚吹吹吓水，講到不如嚟一場說起就走的公路之旅，隨即決定去康和郡，訂好房、求其揀好幾個景點，翌日清早就踩行油門西奔。
由雷丁到康和，全程二百五十八英里，重遠過北上曼徹斯特。中間停過幾次休息，前後六粒鐘先到目的地彭贊斯（Penzance），坐到屁股痛痛地。好彩一路有個伴，而且沿途風景很美，唔算難捱。
到埗第一件事，兩丁友搜尋當地最佳酒吧，搵到間嘢專賣康和麥啤。場內熟客見到兩個外地人來訪，非常熱情輪住請飲。結果幾款麥酒試唔晒，倒有各種各樣烈酒落肚，隊到啤啤夫，晚上九點幾就收隊返歸大覺瞓。
又好彩因為早瞓，我哋第二日七點已經起身，殺去蘭茲角親近大自然。蘭茲角英文Land's End意為「地之盡頭」，係英格蘭最西端。由此望向遠方，係一條筆直水平線。抬頭一望，好多海鷗吼住我手上杯雪糕，不得不防。
自從離開香港，兩年無接觸過大海。忽有陣陣海水味隨風撲面，諗起那些年會去海怡半島望住個海食M記睇日落；諗起以前半夜三更遊車河去舂坎角望住個海食宵賣；諗起去西貢露營，一早起身係畀海浪聲嘈醒……
到我回過神，已經流淚滿面。
室友靜靜遞來一支菸。各位小朋友唔好學。
是時風很大，吹到頭都歪埋。
是時風很大。手在震，根本點唔着支菸。
不遠處傳來一聲慘叫。原來有海鳥在半空大解放，雀屎隨風襲中一名少女。
是時風很大，一頭金髮添班駁。
風很大，吹不散傷痕。
風很大，會引爆笑彈。